Námskeiðið er ætlað öllum sem hafa áhuga á að velta fyrir sér birtingarmyndum fötlunar í menningu og listum, og umfjöllun um fötlun í fjölmiðlum.

Birtingarmyndir fötlunar er mikilvæg heimild um viðhorf samfélaga til fatlaðs fólks. Innan fræðanna hefur lítil áhersla verið lögð á að skoða samspil fötlunar, menningar og lista ef frá eru taldar þær fræðigreinar er snúa að notkun listgreina í kennslu, þjálfun og endurhæfingu. Sú áhersla er oft í samræmi við hefðbundinn skilning á fötlun sem galla sem þarf að bregðast við að lækna og laga. Með tilkomu fötlunarfræða og nýjum skilningi á fötlun sem leggur áherslu á félagslega þætti hefur áhugi aukist á birtingarmyndum fötlunar í menningu, listum og fjölmiðlaumfjöllun um fatlað fólk.

Markmið námskeiðsins er að þátttakendur öðlist þekkingu og skilning á menningarbundnum hugmyndum um fötlun. Á námskeiðinu verður rýnt í stöðu og ímynd fatlaðs fólks og birtingarmyndir fötlunar í menningu vestrænna samfélaga. Fjallað verður um ímyndir og hlutverk fatlaðs fólks m.a. í listum, dægurmenningu, fjölmiðlum og bókmenntum. Umfjöllun námskeiðsins verður sett í samhengi við stöðu fatlaðs fólks í menningu samtímans.

Þátttakendum námskeiðsins er boðið á málþing: Fötlun, listir og menning III sem haldið verður 30. apríl 2010 og taka þátt í umræðum að fyrirlestrum loknum.

Námskeiðið verður sent um fjarfundabúnað á Fræðslu- og símenntunarmiðstöðvar svo og á aðra staði sé þess óskað.

Athugið við skráningu!

Skipuleggjendur námskeiðsins leggja áherslu á að það sé aðgengilegt fyrir alla og lagað að þörfum þátttakenda. Því biðjum við þig um að taka fram, í athugasemdareit við rafræna skráningu eða við skráningu í síma, ef eitthvað af neðangreindu á við um þig:

• Þarf táknmálstúlk
• Þarf námsgögn á stækkuðu letri eða blindraletri
• Þarf námsgögn á auðlesnum texta
• Þarf rittúlk
• Kem með aðstoðarmann
• Nota hjólastól
• ... eða annað sem skiptir máli að skipuleggjendur viti af.

Kennari: Hanna Björg Sigurjónsdóttir, lektor og
Kristín Björnsdóttir, aðjúnkt í fötlunarfræðum við Háskóla Íslands
Tími: Mán. 12. apr. og fim. 15. apr. kl. 16 - 19, lau. 17. apr. kl. 9 - 12, mán. 26. apr. og fim. 29. apr. kl. 16 - 19 (5x)
Verð: 29.900 kr.
Staður: Endurmenntun, Dunhaga 7
Frekari upplýsingar og skráning eru hjá www.endurmenntun.is
 eða í síma 525-4444